Jun 13

வாதாட வக்கீலின்றி தவிக்கும் பாகிஸ்தான் முன்னாள் பிரதமர் நவாஸ் ஷெரீஃப்

சொத்துகுவிப்பு வழக்கில் தனக்கு ஆதரவாக வழக்கறிஞர்கள் ஆஜராக மறுப்பு தெரிவித்துவருவதாக பாகிஸ்தான் முன்னாள் பிரதமர் நவாஸ் ஷெரீஃப் கவலை தெரிவித்துள்ளார்.

இங்கிலாந்து தலைநகர் லண்டனில் கோடிக்கணக்கான சொத்துக்களை நவாஸ் ஷெரீஃப் மற்றும அவரது குடும்பத்தினர் வாங்கி குவித்துள்ளதாக பனாமா ஆவணத்தில் குறிப்பிடப்பட்டிருந்தது. 

இதுதொடர்பான வழக்கை விசாரித்த பாகிஸ்தான் உச்சநீதிமன்றம், நவாஸ் ஷெரீஃபை பிரதமர் பதவியிலிருந்து தகுதி நீக்கம் செய்து பரபரப்பு உத்தரவு பிறப்பித்தது. 

மேலும் தற்போது இந்த வழக்கு இஸ்லாமாபாத் நீதிமன்றத்தில் நடந்து வரும் நிலையில், அதை ஒரு மாதத்திற்குள் முடிக்க நீதிமன்றம் வற்புறுத்தியது. ஆனால் தன்னால் ஒரு மாத காலத்திற்குள் இந்த சொத்து குவிப்பை வழக்கை முடிக்க முடியாது என்று கூறி, நவாஸ் ஷெரீஃபின் வழக்கறிஞர் கவாஜா ஹரிஸ் விலகிச்சென்று விட்டார்.

ஒரு மாத காலத்திற்குள் இந்த வழக்கை முடிக்க முடியாத நிலையில் தவித்து வரும் நவாஸ் ஷெரீஃப் தனது அடிப்படை உரிமைகள் மீறப்பட்டுள்ளது, நீதிமன்றத்தில் தொந்தரவு காரணமாக எந்த வழக்கறிஞரும் தனது வழக்கில் ஆஜராஜ மறுக்கின்றனர் என்று கவலை தெரிவித்துள்ளார். 

சொத்து குவிப்பு வழக்கு தொடர்பான குற்றச்சாட்டுகளுக்கு எந்த ஆதாரங்களும் எதிர்கட்சிகள் தரப்பில் இல்லை. அதனால் தன்னை எப்படியாவது சிக்கவைக்க வேண்டும் என்ற நோக்கில் நீதிமன்றத்தை வைத்து எதிர்கட்சிகள் தொந்தரவு ஏற்படுத்தி வருவதாக நவாஸ் ஷெரீஃப் குற்றம்சாட்டியுள்ளார்.