May 26

லண்டன்: இந்தியரின் டீக்கடையில் அகதிகளுக்கு வேலைவாய்ப்பு

லண்டனில் வசிக்கும் இந்தியர், டீக்கடை அமைத்து அகதிகளுக்கு வேலை வாய்ப்பு ஏற்படுத்தி தரும் சமூக சேவையை செய்து வருகிறார்.

'சாய்காரம்' எனும் மசாலா டீக்கடை நிறுவனரான தலைநகர் டெல்லியைச் சேர்ந்த பிரணவ் சோப்ரா(33), லண்டனில் உள்ள நிறுவனத்தில் ஆலோசகராக பணிபுரிந்து வருகிறார்.இவர், சமீபத்தில், போர் காரணமாக ஈராக்கில் இருந்து ஐரோப்பாவுக்கு தப்பியோடி வந்த அகதி குடும்பத்தினர் வலுக்கட்டாயமாக அவர்களது நாட்டுக்கு திருப்பி அனுப்பி வைக்கப்பட்டதை தொலைக்காட்சியில் பார்த்து தெரிந்துள்ளார்.

இதையடுத்து, லண்டனுக்கு பிழைப்புத்தேடி வரும் அகதிகளுக்கு வேலைவாய்ப்பு ஏற்படுத்தி தர திட்டமிட்டு டீக்கடை ஒன்றை துவங்கியுள்ளார். அமெரிக்க அதிபர் டிரம்ப்பின் விசா தடைக்கு எதிராக, பல்வேறு நாடுகளைச் சேர்ந்த 10,000 அகதிகளுக்கு பணி வழங்கப்படும் என ஸ்டார்பக்ஸ் கடந்த ஜனவரி மாதம் உறுதியளித்திருந்தது.

ஆனால், தற்போது 'சாய்கிராம்' மூலம் சிறிய அளவில் அகதிகளுக்கான வேலைவாய்ப்பை சோப்ரா ஏற்படுத்திக் கொடுத்துள்ளார்.தற்போது சிரியா, எரித்திரியா, ஈராக், சூடான் மற்றும் பாகிஸ்தான் நாடுகளைச் சேர்ந்த 7 அகதிகள் சாய்கிராமில் பணியாற்றி வருகின்றனர்.

சாய்கிராமின் மையங்கள் 2 லண்டன் சந்தைகளில் இயங்கி வருவதாகவும், 20 கபே-க்களுக்கு மசாலா டீ விநியோகம் செய்யப்பட்டு வருவதாகவும் தெரிவிக்கப்பட்டுள்ளது. மசாலா டீ மட்டுமல்லாமல் ஐஸ் டீ போன்றவைகளும் வாடிக்கையாளர்களுக்கு வழங்கப்படுகிறது. இவை அனைத்தும், சோப்ராவின் பாட்டி சொல்லும் ரெசிபியை கேட்டறிந்து, அகதிகள் தயாரிப்பதாக கூறப்படுகிறது.

பொதுவாக லண்டனில் ' சாய் லேட்ஸ் ( டீ-யின் மேல் சாக்லேட் துண்டுகள்)' மிகவும் பிரபலம், தற்போது மசாலா டீ-யும் டிரெண்டாகி வருகிறது. இந்தியாவின் பேரில் சமூக தாக்கத்தை ஏற்படுத்துவது மகிழ்ச்சியளிப்பதாக சோப்ரா தெரிவித்துள்ளார்.

விரைவில், அகதிகளை கொண்டு லண்டனில் பல இடங்களில் 'சாய்கிராம்' கிளையை தொடங்க திட்டமிட்டிருப்பதாகவும், அண்டை நாடுகளுக்கு டீ-யை விற்பனை செய்யவும் திட்டமிட்டுப்பதாக அவர் தெரிவித்துள்ளார்.