May 26

கோலி - அனுஷ்கா சர்மாவுக்கு விரைவில் திருமணம்?

காதல் பறவைகளாக சுற்றித்திரியும் கிரிக்கெட் வீரர் கோலி மற்றும் பாலிவுட் நடிகை அனுஷ்கா சர்மா விரைவில் திருமண பந்தத்தில் இணையலாம் என கிரிக்கெட் வட்டாரங்கள் தெரிவிக்கின்றன.

முன்பை விட அதிகளவில் வெளியே சுற்றித்திரியும் கோலி - அனுஷ்கா சர்மா ஜோடி புகைப்படம் எடுக்க யாரையும் தடுப்பதில்லை. இந்த மாதத்தில் நடந்த ஜகீர் கான் - சகாரிகா கட்கேவின் திருமண நிச்சயதார்த்ததில் கோலி - அனுஷ்கா ஜோடியாக கலந்து கொண்டனர்.

அதே போல், இன்று வெளியாகியுள்ள சச்சினின் வாழ்க்கை குறித்த படத்தை, கிரிக்கெட் வீரர்களுக்கு பிரீமியர் ஷோ மூலம் திரையிட்டு காட்டினார் சச்சின். இந்த திரைப்படத்தைப் பார்க்க சென்ற கோலி கிரிக்கெட் வீரர்களுடன் செல்லாமல், அனுஷ்கா சர்மாவுடன் கைகோர்த்து சென்றார்.

பல இடங்களில் கைகோர்த்த வண்ணம் செல்லும் கோலி - அனுஷ்கா ஜோடி விரைவில் திருமணம் செய்வதற்கான வாய்ப்புகள் அதிகம் என கூறப்படுகின்றது. இதுகுறித்த அறிக்கையை விரைவில் கோலி வெளியிடுவார் என தெரிகின்றது