May 25

ரசிகர்களுக்கு ரஜினி கடும் எச்சரிக்கை

நற்பெயருக்கு களங்கம் கற்பிக்கும் வகையில் செயல்படும் ரஜினி ரசிகர் மன்ற நிர்வாகிகள், உறுப்பினர்கள் மீது நடவடிக்கை எடுக்கப்படும் என ரஜினி தனது ரசிகர்களுக்கு எச்சரிக்கை விடுத்துள்ளார்.

இது தொடர்பாக ரஜினிகாந்த் வெளியிட்டுள்ள அறிக்கையில், நற்பெயருக்கு களங்கம் விளைவிக்கும் வகையில் நடந்து கொண்டால் ரசிகர் மன்றத்தின் அடிப்படை உறுப்பினர் தகுதியிலிருந்து நீக்கப்படுவார்கள், மன்றத்திலிருந்து நீக்க தலைமை மன்ற நிர்வாகி சுதாகருக்கு அதிகாரம் அளிக்கிறேன் என நடிகர் ரஜினிகாந்த் தெரிவித்துள்ளார்.

நீண்ட இடைவெளிக்குப் பிறகு சமீபத்தில் தனது ரசிகர்களை சந்தித்த ரஜினிகாந்த் அவர்களுடன் புகைப்படம் எடுத்துக் கொண்டு ரசிகர்களை உற்சாகப்படுத்தினார். இந்நிகழ்ச்சியை தொடர்ந்து ரஜினிகாந்தின் அரசியல் பிரவேசம் குறித்து பல்வேறு அரசியல் கட்சி பிரமுகர்கள் ஆதரவும், எதிர்ப்பும் தெரிவித்து வருகின்றனர்.

இந்நிலையில், ரஜினிக்கு எதிராக கருத்து தெரிவிக்கும் அரசியல் பிரமுகர்களை கண்டித்து ரஜினி ரசிகர்கள் போராட்டம் உள்ளிட்டவற்றில் ஈடுபட்டனர். மேலும், சமூக வலைத்தளங்கள் வாயிலாகவும், சுவரொட்டிகள் மூலமும் ரஜினியின் அரசியல் பிரவேசம் குறித்து கருத்துக்களை பகிர்ந்து வந்தன் விளைவாக தற்போது ரஜினிகாந்த் இந்த அறிக்கையை வெளியிட்டுள்ளார்.

இதனிடையே, பா.ரஞ்சித் இயக்கத்தில் ரஜினிகாந்த் நடிக்கவிருக்கும் திரைப்படத்தின் தலைப்பு இன்று வெளியிடப்பட்டது. தற்போது, ரஜினியின் அரசியல் விவாதங்கள் ஒருபுறம் இருக்க புதுப்பட தலைப்பான 'காலா'' மீதான விவாதம் சமூக வலைத்தளங்களில் காரசாரமாக பேசப்பட்டு வருகிறது. வருகிற மே 28ஆம் தேதி முதல் 'காலா' திரைப்படத்தின் படப்பிடிப்புகள் மும்பையில் துவங்கவிருப்பது குறிப்பிடத்தக்கது.