May 09

இரண்டாம் உலகப்போரின் நினைவு நாள் கொண்டாட்டங்கள்!

இரண்டாம் உலகப்போரின் நினைவு நாள் நேற்று (மே8) சோம்ப்ஸ்-எலிசேயில் கொண்டாடப்பட்டது.

வருடா வருடம் இரண்டாம் உலகப்போரின் வீரர்களுக்கான அஞ்சலி நிகழ்வு இங்கு கொண்டாடப்படுகிறது. மே 8, 1945 ஆம் வருடம் ஜெர்மனியின் நாசி துருப்புக்கள் சரணடைந்த நாளை இரண்டாம் உலகப்போரின் இறுதி நாள் என அடையாளப்படுத்தியுள்ளனர்.

சோம்ப்ஸ்-எலிசேக்கு இந் நிகழ்விற்காக வருகை தந்த ஜனாதிபதி இம்மானுவல் மக்ரோன், பிரதமர் எத்துவா பிலிப் மற்றும் பல அரசியல் தலைவர்கள் அஞ்சலி நிகழ்வில் கலந்துகொண்டனர். இதன் தொடர்ச்சியாக, இரண்டாம் உலகப்போரின் ஒப்பற்ற வீரரும், படைத்தளபதியும், பின்நாளில் பிரான்ஸின் ஜனாதிபதியுமாகிய சாள்-து-கோல் அவர்களின் சிலைக்கு முன்னால் மூவர்ணத்தினாலான மலர்மாலை வைக்கப்பட்டு, அஞ்சலி செலுத்தப்பட்டது.

பின்னர், Arc de Triomphe சென்ற மக்ரோன், ‘பெயர் தெரியா மாவீரன்’ (Tombe du soldat inconnu) நினைவிடத்தில் தீபம் ஏற்றி அஞ்சலி செலுத்தியமை குறிப்பிடத்தக்கது.