May 23

சுகோய் - 30 ரக போர் விமானம் மாயம்: இந்திய - சீன எல்லையில் பறந்த போது தொடர்பை இழந்தது

இந்திய விமானப் படைக்குச் சொந்தமான சுகோய் – 30 ரக விமானம், இந்திய – சீன எல்லையில் பறந்து கொண்டிருந்த போது ரேடார் உடனான தொடர்பை இழந்து மாயமானது.

இன்று காலை 9.30 மணிக்கு அசாம் மாநிலம் தேஜ்பூர் படை தளத்திலிருந்து இரண்டு விமானிகளுடன் சுகோய் – 30 ரக விமானம் பறக்க தொடங்கியது. முற்பகலில் தேஜ்பூரிலிருந்து 60 கிலோ மீட்டர் தொலைவில் பறந்து கொண்டிருந்த போது ரேடாரின் தொடர்பை இழந்துள்ளது.

ரேடாரின் தொடர்பை இழந்த இடமானது ஏற்கனவே அதிக சர்ச்சைக்குள்ளான இந்திய – சீன எல்லையாகும். மாயமாகியுள்ள விமானம் விபத்துக்குள்ளாகியுள்ளதா அல்லது வேறு ஏதும் காரணமாக தரையிறக்கப்பட்டுள்ளதா என்பது குறித்து விமானப் படையினர் தேடுதல் வேட்டையை துவக்கியுள்ளனர்.

இந்த எல்லைக் கோட்டிற்கு அருகில் சீனாவின் விமானப் படை தளமும் இருப்பதால், அந்நாட்டு ரேடார் சிக்னல்களால் சுகோய் – 30 ரக விமானம் தவறாக வழிநடத்தப்பட்டுள்ளதா என்பது குறித்தும் விசாரணை நடைபெற்று வருகிறது.

இந்திய விமானப் படையில் சமீபத்தில் இணைக்கப்பட்ட நவீன ரக விமானங்களில் ஒன்று சுகோய் – 30 ரக விமானம் ஆகும். சூப்பர் சோனிக் ரக தொழில்நுட்பத்தில் இயங்கும் சுகோய் ரக விமானங்களில் விபத்துக்கள் ஏற்படுவதற்கான வாய்ப்புகள் மிக மிக குறைவு. பயிற்சி, கண்கானிப்பு உள்ளிட்ட பணிகளில் இந்த விமானங்கள் தற்போது இந்திய விமானப் படையால் பயன்படுத்தப்பட்டு வருகிறது.