May 23

நாட்டை ஆள எனக்கே உரிமை உள்ளது; ரஜினி தேவையில்லை: சீமான் ஆவேசம்!!

''தமிழகத்தை ஆள எனக்கே உரிமை உள்ளது. ரஜினிகாந்த் தேவையில்லை'' என்று திருச்சியில் இன்று செய்தியாளர்களுக்கு அளித்த பேட்டியில் நாம் தமிழர் கட்சித் தலைவர் சீமான் காட்டமாக தெரிவித்தார்.

தமிழகத்தில் கடந்த 1996ஆம் ஆண்டில், அதிமுகவுக்கு எதிராக நடிகர் ரஜினிகாந்த் வாய்ஸ் கொடுத்தார். மீண்டும் அதிமுகவுக்கு ஆதரவு கொடுத்தால் தமிழகத்தை யாராலும் காப்பாற்ற முடியாது என்று கூறினார். அப்போது இவரது அதிமுக எதிர்ப்பு, திமுகவுக்கு ஆதரவாக அமைந்தது. அப்போது தமிழக அரசியலில் இவருக்கு ஒரு வாய்ப்பு இருந்தது என்றே கூறலாம். அப்போது இவரை யாரும் வித்தியாசப்படுத்தி பார்க்கவில்லை.

ஆனால், இன்று நிலைமை அப்படியில்லை.அரசியல் குறித்து ரஜினி பேசினாலே பல்வேறு தரப்புகளில் இருந்தும் எதிர்ப்பு கிளம்பி வருகிறது. கடந்த வாரம் தனது ரசிகர்களுடன் புகைப்படம் எடுத்துக் கொண்ட ரஜினிகாந்த், தனது அரசியல் பிரவேசம் குறித்து பேசினார். ''போர் வரும்போது பார்த்துக் கொள்ளலாம்'' என்பதே அவரது பேச்சின் ஹைலைட்.

இந்நிலையில் இவரை திமுக செயல் தலைவர் ஸ்டாலின், விசிக தலைவர் திருமாவளவன் ஆகியோர் வரவேற்கும்போது, நாம் தமிழர் கட்சித் தலைவர் சீமான் மட்டும் கடுமையாக எதிர்த்து வருகிறார். ரஜினிகாந்த் தனிக்கட்சி துவங்குவதற்கு மட்டுமே திருமாவளவனும் ஆதரவு அளிக்கிறார்.

இந்நிலையில், இன்று திருச்சியில் செய்தியாளர்களுக்கு அளித்த பேட்டியில் சீமான் கூறுகையில், ''தமிழகத்தை ஆளுவதற்கு நான் இருக்கிறேன். ரஜினிகாந்த் தேவையில்லை. அவர் இங்கு சம்பாதித்துவிட்டு போகட்டும். அவர் தமிழக மக்களுக்கு என்ன செய்ய வேண்டும் என்று நினைக்கிறாரோ, அதை நாங்களே செய்து கொள்வோம்'' என்று தெரிவித்துள்ளார்.