May 20

ரூ.1,500 கோடி வசூலித்து 'பாகுபலி 2' சரித்திரம் காணாத வெற்றி

இயக்குனர் எஸ்.எஸ்.ராஜமௌலியின் பிரம்மாண்ட படைப்பான 'பாகுபலி 2' வெளியாகி 21 நாட்களில் ரூ.1500 கோடி வசூலை கடந்து இந்திய திரையுலகம் கண்டிராத இமாலய சாதனையை படைத்துள்ளது.

கடந்த ஏப்ரல் 28ஆம் தேதி வெளியான இப்படம் வட இந்தியாவில் ரூ.953 கோடி வசூலித்தும், தென்னிந்தியாவில் ரூ.1,227 கோடி வசூலித்தும், வெளிநாடுகளில் ரூ.275 கோடி வசூலித்தும் ரூ.1,500 கோடி வசூலித்து புதிய சாதனை படைத்துள்ளது. இது குறித்த தகவலை பிரபல வர்த்தக வல்லுநர் ரமேஷ் பாலா தனது டுவிட்டர் பக்கத்தில் பதிவிட்டுள்ளார்.

இந்நிலையில், உலகளவில் மொத்த வசூலில் ரூ.1500 கோடியை கடந்ததையொட்டி, 'பாகுபலி 2' படக்குழுவினர் மகிழ்ச்சியுடன் கொண்டாடி வருகின்றனர். 'பாகுபலி 2' ரூ.1500 கோடி வசூலை எட்டிய நிலையில், அதனை குறிப்பிடம் விதமாக ராஜமாதா சிவகாமி மற்றும் யுவராணி தேவசேனாவின் போஸ்டரை படக்குழு வெளியிட்டுள்ளது.

பாலிவுட்டில் இதுவரை கான் நடிகர்களின் வசூல் சாதனையை, தென்னிந்திய நடிகரான பிரபாஸ் முறியடித்துள்ளார். மேலும், தமிழில் சூப்பர்ஸ்டார் ரஜினிகாந்த் நடித்த 'எந்திரன்' படத்தின் ஒட்டுமொத்த வசூல் சாதனையையும் 'பாகுபலி 2' முறியடித்துள்ளது.

பிரபாஸ், அனுஷ்கா, சத்யராஜ், ரம்யாகிருஷ்ணன், நாசர், ராணா, தமன்னா நடிப்பில் வெளியான இப்படம் விரைவில் ரூ.2,000 கோடி வசூலித்து ஹாலிவுட் படங்களின் வசூல் சாதனையை முறியடிக்கும் என எதிர்ப்பார்க்கப்படுகிறது.