Mar 23

சாம்சங் ஸ்மார்ட்போன்களில் இன்-ஸ்கிரீன் கைரேகை சென்சார்

விவோ போன்றே சாம்சங் நிறுவனமும் தனது ஸ்மார்ட்போன்களில் இன்-ஸ்கிரீன் கைரேகை சென்சார் வழங்க திட்டமிட்டு வருவதாக தகவல் வெளியாகியுள்ளது.

ஸ்மார்ட்போன்களில் இன்-ஸ்கிரீன் கைரேகை சென்சார் அம்சம் பிரபலமாகி வருகிறது. விவோ நிறுவனம் இந்த தொழில்நுட்பத்தை தனது ஸ்மார்ட்போனில் முதல் முறையாக அறிமுகம் செய்தது. விவோவை தொடர்ந்து பெரும்பாலான நிறுவன ஸ்மார்ட்போன்களில் இன்-ஸ்கிரீன் கைரேகை சென்சார் அதிகம் எதிர்பார்க்கப்படும் அம்சமாக இருக்கிறது.

விவோ நிறுவனத்தை தொடர்ந்து சாம்சங் தனது கேலக்ஸி நோட் 9 ஸ்மார்ட்போனில் இன்-ஸ்கிரீன் கைரேகை சென்சார் தொழில்நுட்பத்தை வழங்க திட்டமிட்டு வருவதாக தகவல் வெளியாகியுள்ளது. இதுகுறித்த முக்கிய முடிவு அடுத்த மாத இறுதியில் சாம்சங் எடுக்க இருப்பதாக கூறப்படுகிறது.

இன்-ஸ்கிரீன் கைரேகை சென்சார் வழங்குவது குறித்து முரணான தகவல்கள் வெளியாகி வரும் நிலையில், கொரியா ஹெரால்டு வெளியிட்டிருக்கும் தகவல்களின் படி சாம்சங் ஸ்மார்ட்போனில் இன்-ஸ்கிரீன் கைரேகை சென்சார் வழங்குவது குறித்த முடிவினை சாம்சங் விரைவில் எடுக்கப்போவதாக அறிவிக்கப்பட்டிருக்கிறது.

இத்துடன் சாம்சங் சாதனங்களுக்கான டிஸ்ப்ளேக்களை தயாரிக்கும் பிரிவில் இருந்து வெளியாகி இருக்கும் தகவல்களின் படி இன்-ஸ்கிரீன் கைரேகை சென்சார் வழங்க ஏதுவாக மூன்று முதல் நான்கு வித பேனல்கள் தயாரிக்கப்பட்டு இருப்பதாக கூறப்படுகிறது.

கேலக்ஸி நோட் 9 ஸ்மார்ட்போனில் இன்-ஸ்கிரீன் கைரேகை சென்சார் வழங்குவது தொடர்பாக சாம்சங் டிஸ்ப்ளே மற்றும் சாம்சங் எலெக்ட்ராணிக்ஸ் இடையே தொடர்ந்து பேச்சுவார்த்தை நடைபெற்று வருவதாகவும் கூறப்படுகிறது. எனினும் இதுகுறித்த முடிவு இன்னும் எட்டப்படவில்லை என்றும் குறைந்தபட்சம் இம்மாத இறுதியில் முடிவு எட்டப்படலாம் என எதிர்பார்க்கப்படுகறது.

சாம்சங் ஸ்மார்ட்போன்களை மற்ற சாதனங்களில் இருந்து முற்றிலும் வித்தியாசப்படுத்தும் வகையில் இன்-ஸ்கிரீன் கைரேகை சென்சார் வழங்கப்படலாம் என்றும், இன்-ஸ்கிரீன் கைரேகை சென்சார் கொண்ட சாம்சங் ஸ்மார்ட்போன் 2019-ம் ஆண்டு வாக்கில் அறிமுகம் செய்யப்படலாம் என்றும் தகவல்கள் வெளியாகியுள்ளன.

சமீபத்திய சாம்சங் அறிவிப்பின் படி புதிய தொழில்நுட்பங்களை முதலில் வழங்குவதை விட, அவற்றை மிகவும் சிறப்பாகவும், சீராகவும் வேலை செய்யும் படி வழங்குவதே சாம்சங் நோக்கம் என தெரிவிக்கப்பட்டு இருந்தது. அந்த வகையில் இன்-ஸ்கிரீன் கைரேகை சென்சார் மட்டுமின்றி புதிய தொழில்நுட்பங்கள் அனைத்தும் சாம்சங் ஸ்மார்ட்போன்களில் சீராக வேலை செய்யும் போதே வழங்கப்படும்.