May 18

கருணாநிதி வைர விழா நிகழ்ச்சியில் ராகுல் பங்கேற்பு

திமுக தலைவர் கருணாநிதியின் வைர விழா நிகழ்ச்சியில் காங்கிரஸ் துணை தலைவர் ராகுல் பங்கேற்க உள்ளார்.

நாட்டின் மூத்த அரசியல்வாதியான திமுக தலைவர் கருணாநிதி, சட்டப்பேரவைக்குள் காலடி எடுத்துவைத்து இந்த ஆண்டு ஏப்ரல் மாதத்துடன் அறுபது ஆண்டுகள் நிறைவடைந்துள்ளது. இந்த வைர விழாவை மிகப் பிரம்மாண்டமாக நடத்த திமுக திட்டமிட்டுள்ளது.

அதன்படி, திமுக தலைவர் கருணாநிதியின் இந்த வைர விழா கொண்டாட்டம் அவரது பிறந்தநாளான ஜூன் 3-ம் தேதி நடைபெறவுள்ளது. இதற்காக, பல மாநில முதல்வர்கள் உள்ளிட்ட நாட்டின் மூத்த அரசியல் கட்சித் தலைவர்கள் என பல்வேறு தரப்பினருக்கும் திமுக சார்பில் அழைப்பு விடுக்கப்பட்டுள்ளது.

இந்நிலையில், திமுக தலைவர் கருணாநிதியின் வைர விழா நிகழ்ச்சியில் காங்கிரஸ் துணை தலைவர் ராகுல் பங்கேற்க உள்ளதாக தெரிவிக்கப்பட்டுள்ளது. அக்கட்சியின் தலைவர் சோனியாவுக்கு உடல்நலக் குறைவு ஏற்பட்டுள்ளதால், அவருக்கு பதிலாக ராகுல் பங்கேற்பார் எனவும் தெரிவிக்கப்பட்டுள்ளது.

முன்னதாக, காங்கிரஸ் துணைத் தலைவர் ராகுலை சந்தித்த திமுக மாநிலங்களவை உறுப்பினர் கனிமொழி, கருணாநிதியின் வைர விழா கொண்டாட்டத்தில் கலந்து கொள்ள வருமாறு அழைப்பு விடுத்திருந்தது நினைவிருக்கலாம்.

கடந்த 1957-ஆம் ஆண்டு ஏப்ரல் மாதம் குளித்தலை சட்டமன்றத் தொகுதியிலிருந்து தமிழக சட்டபேரவைக்கு முதல் முறையாக கருணாநிதி தேர்ந்தெடுக்கப்பட்டார். அன்று முதல் இன்று வரை தான் போட்டியிட்ட அனைத்து சட்டப்பேரவைத் தேர்தல்களிலும் வெற்றி பெற்று, தொடர்ச்சியாக 13 முறை சட்டப்பேரவை உறுப்பினர் என்ற பெருமையை இந்தியாவில் தனக்கு மட்டுமே உரித்தாக்கிக் கொண்டவர் கருணாநிதி என்பது குறிப்பிடத்தக்கது.