May 17

பிளஸ் 1 வகுப்பிற்கு அடுத்தாண்டு முதல் பொதுத்தேர்வு: தமிழக அரசு

வரும் கல்வியாண்டு முதல் பிளஸ் 1 வகுப்பிற்கும் பொதுத் தேர்வு நடத்தப்படும் என்று தமிழக அரசு தெரிவித்துள்ளது.

தமிழகத்தில் கடந்த 11ஆம் தேதி பிளஸ் 2 தேர்வு முடிவுகள் வெளியிடப்பட்டன. முதல் முறையாக மாணவர்களின் மதிப்பெண் பட்டியலுக்கு பதிலாக தேர்ச்சி விகிதம் மட்டும் வெளியிடப்பட்டன. அதன் மூலம் மாணவர்களின் மன அழுத்தத்தை குறைக்க முடியும் என்றும், ஆரோக்கியமான போட்டியை ஊக்குவிக்க முடியும் என்று கல்வித் துறை அமைச்சர் செங்கோட்டையன் அறிவித்தார்.

மேலும் பிளஸ் 1 வகுப்பிற்கு பொதுத் தேர்வு முறையை அறிமுகப்படுத்த ஆலோசனை மேற்கொள்ளப்பட்டு வருவதாக தெரிவித்திருந்தார்.இந்நிலையில் இன்று செய்தியாளர்களிடம் பேசிய அமைச்சர் செங்கோட்டையன், வரும் கல்வி ஆண்டு முதல் பிளஸ் 1 வகுப்பிற்கு பொதுத் தேர்வு நடத்தப்படும் என்று கூறினார்.

ஏற்கனவே 10ஆம் வகுப்பு, பிளஸ் 2 வகுப்பிற்கு மட்டும் பொதுத் தேர்வு நடத்தப்பட்டு வந்தது. அதனால் பிளஸ் 1 வகுப்பில் பாடங்கள் ஒழுங்காக நடத்தப்படுவதில்லை என்றும், அந்த காலகட்டத்தில் பிளஸ் 2 பாடங்கள் எடுக்கப்படுவதாக குற்றச்சாட்டுகள் எழுந்து வந்தன. இந்நிலையில் இனி மாணவர்கள் தொடர்ச்சியாக 3 பொதுத் தேர்வுகளை சந்திக்கும் சூழல் ஏற்பட்டுள்ளது.