Feb 25

அர்ப்பணிப்பும், திறமையும் கொண்ட நடிகை ஸ்ரீதேவியின் மறைவால் அதிர்ச்சி: பிரபு, ராதாரவி, விஜயகுமார்

நடிகை ஸ்ரீதேவியின் மறைவு மிகவும் அதிர்ச்சியை ஏற்படுத்தி உள்ளது. அவரின் இழப்பால் வருத்தத்தில் இருப்பதாக நடிகர்கள் பிரபு, ராதாரவி, விஜயகுமார் ஆகியோர் வருத்தம் தெரிவித்துள்ளனர்.

தமிழ் மற்றும் இந்தி திரைப்படங்களில் நடித்துப் புகழ்பெற்றவர் ஸ்ரீதேவி. தமிழில் ரஜினி, கமல் உள்ளிட்ட முண்ணனி நடிகர்களின் திரைப்படங்களில் நாயகியாக நடித்தவர்.

தமிழ், இந்தி மட்டுமில்லாது தெலுங்கு, மலையாளம் உள்ளிட்ட மொழிகளும் மிகச்சிறந்த படங்களில் நடித்தவர்.அவருக்கு இந்தியா முழுவதும் ரசிகர்கள் உண்டு. பல்வேறு விருதுகளும் அவர் பெற்றுள்ளார்.

நடிகர் பிரபு இதுகுறித்து கூறும்போது, மிகவும் திறமையான நடிகையான ஸ்ரீதேவியின் மரணம் என்னையும் என் குடும்பத்தையும் அதிர்ச்சியில் ஆழ்த்தியுள்ளது. பழகுவதற்கு மிகவும் இனிமையான குணம் கொண்டவர். அவரின் இழப்பு அவரது குடும்பத்திற்கு பேரிழப்பு. அவர்களுக்கு என்ன சொல்லி ஆறுதல் படுத்துவது என்று தெரியாமல் தவித்து வருவதாகக் குறிப்பிட்டார்.

நடிகர் ராதாரவி கூறுகையில், ஸ்ரீதேவி மிகவும் அர்ப்பணிப்புள்ள நடிகை. அவரது மரணம் மிகவும் அதிர்ச்சி அளிக்கிறது. தனது திரைப்படங்களில் நடிப்பின் மூலம் தனி அடையாளத்தைப் பதித்தவர். இந்த செய்தி கேட்டதில் இருந்து நான் அதிர்ச்சியில் இருந்து மீளவில்லை. அவர் நடிக்காத மொழியே இல்லை. கமல்ஹாசன் போலவே மிகச்சிறந்த திறமை கொண்டவர். அவரை இறைவன் நம்மிடம் இருந்து பிரித்துக்கொண்டது வருத்தமளிக்கிறது என்று தெரிவித்தார்.

நடிகர் விஜயகுமார் கூறுகையில், தமிழகத்தில் இருந்து வட இந்தியா சென்று திரைத்துறையில் கோலோச்சிய மிகச்சிலரில் முக்கியமானவர் ஸ்ரீதேவி. எங்கள் குடும்பத்திற்கு மிகவும் நெருக்கமான நண்பர். அவர் இல்லாதது, இந்திய திரை உலகத்திற்கே மிகவும் வருத்தத்திற்குரியது. இந்திய அளவில் நடிகைகளில் அவர் தான் சூப்பர் ஸ்டார். அவர் இல்லாதது பெரும் துயரம் தான் என்று இரங்கல் தெரிவித்துள்ளார்.