May 17

இன்று உலக ரத்த அழுத்த தினம்: இந்தியாவில் மருத்துவர்கள் ரத்த கொதிப்பால் பாதிக்கப்படுவதாக ஆய்வில் தகவல்

மே 17ம் தேதியான இன்று உலக உயர் ரத்த அழுத்த தினமாக பின்பற்றப்படுகிறது.

இன்றைய நாளில், மருத்துவர்களே அதிகமாக, ரத்த அழுத்த நோயில் பாதிக்கப்படுவதாக, தெரியவந்துள்ளது. பொதுவாக, அனைத்து மக்களின் உடல்நலத்தை பாதுகாக்க வேண்டிய கடமை மருத்துவர்களுக்கே உள்ளது. அவர்கள் மிகவும் பொறுமைசாலிகளாக செயல்படுவதே வழக்கமாக இருந்துவருகிறது.

எந்த நேரத்திலும் நிதானம் இழக்காதவர்கள், மருத்துவர்கள் எனக் கூறப்பட்டு வரும் நிலையில், இந்திய மருத்துவர்கள் கூட்டமைப்பு அதிர்ச்சிகர தகவலை வெளியிட்டுள்ளது. அதில், இந்திய அளவில் மருத்துவர்களே அதிகளவு உயர் ரத்த அழுத்த நோயினால் பாதிக்கப்படுவதாகக் கூறப்பட்டுள்ளது.

இந்திய அளவில் உள்ள 33 முதன்மை நகரங்களில் பணிபுரியும் 20 ஆயிரத்திற்கும் அதிகமான மருத்துவர்களிடையே இதுதொடர்பாக, ஆய்வு நடத்தப்பட்டுள்ளது.

இதன்படி, இந்திய மருத்துவர்களில் சுமார் 56 சதவீதம் பேருக்கு, உயர் ரத்த அழுத்த பாதிப்பு உள்ளதாக, தெரியவந்துள்ளது. 37 சதவீத மருத்துவர்கள் உயர் ரத்த அழுத்த பாதிப்பு வருவதற்கான அறிகுறிகளை கொண்டும் உள்ளனர்.

இரவு, பகல் பார்க்காமல் மருத்துவர்கள் பணிபுரிய நேரிடுவதால், அவர்களுக்கு மன உளைச்சல் அதிகரித்து, அது ரத்த அழுத்த பாதிப்பை கொண்டுவந்து சேர்ப்பதாக, மருத்துவர்கள் கூட்டமைப்பின் ஆய்வறிக்கையில் குறிப்பிடப்பட்டுள்ளது.

இது மட்டுமின்றி, இந்திய இளைஞர்களில், சராசரியாக, 3 பேரில் ஒருவருக்கு ரத்த அழுத்த பாதிப்பு உள்ளதென்றும், மாறிவரும் வாழ்க்கை சூழலே இதற்கு முக்கியமான காரணம் என்றும், அந்த ஆய்வில் சுட்டிக்காட்டப்பட்டுள்ளது.