Feb 21

இறப்பை தடுக்க சைரன் டூவீலர் ஆம்புலன்ஸ் அறிமுகம்

ஆம்புலன்ஸ் வேன் நுழைய முடியாத இடங்களில் இறப்பைத் தடுக்கும் வகையில் சைரன் டூவிலர் ஆம்புலன்ஸ் அறிமுகப்படுத்தப்பட்டுள்ளது.

திடீரென்று விபத்து ஏற்படும் போது, விபத்தில் சிக்கியவர்களை உடனடியாக மீட்டு மருத்துவமனைக்கு கொண்டு செல்ல 108 ஆம்புலன்ஸ் சேவை நடைமுறையில் உள்ளது. பல நேரங்களில் நோயாளிகள் இருக்கும் குறுகலான சாலை, சீரற்ற பாதை போன்ற இடங்களில் இது போன்ற ஆம்புலன்ஸ் சென்று வருவது சற்று கடினமான ஒன்று தான்.

இந்த நிலையில் வேன் செல்ல முடியாத இடங்களுக்கும் எளிதாக சென்று வரும் வகையில் புதிதாக சைரன் டூவீலர் ஆம்புலன்ஸ் சேவை அறிமுகப்படுத்தப்பட்டுள்ளது.அவசர உதவிக்கு 108 ஆம்புலன்ஸ் வசதியை தொடர்புகொண்டாலும், நோயாளிகளை அடைவதற்குள் அவர்களுக்குரிய முதலுதவி கிடைக்காமல் சில நேரங்களில் இறப்பு ஏற்பட்டு விடுகிறது.

இதனை குறைக்கும் வகையில், டூவீலர் ஆம்புலன்ஸ் சேவை அறிமுகம் செய்யப்பட்டுள்ளது. முதலுதவி அளிக்கத்தெரிந்த மருத்துவ உதவியாளர்கள் இந்த டூவீலர் ஆம்புலன்ஸை இயக்குவார்கள், முதல் கட்டமாக இந்த டூவீலர் ஆம்புலன்ஸ் வசதி திண்டுக்கல்லில் அறிமுகம் செய்து வைக்கப்பட்டுள்ளது.இந்த ஆம்புலன்ஸ் வசதியில் பின்பக்கம், ஒரு பெட்டியுள்ளது.

இதில், முதலுதவிக்கு தேவையான ஆக்சிஜன் சிலிண்டர், மருந்துகள், ஊசிகள் உள்ளிட்ட 54 வகையான மருந்துகள் இடம்பெற்றுள்ளன. திண்டுக்கல் மாவட்டத்தில் உள்ள அரசு தலைமை மருத்துவமனையிலிருந்து சுமார் 20 கி.மீ சுற்றளவுக்கு மட்டும் தான் இந்த டூவீலர் ஆம்புலன்ஸ் சேவை அறிமுகம் செய்து வைக்கப்பட்டுள்ளது.

எப்போதெல்லாம், அவசர உதவிக்கு 108 ஆம்புலன்ஸ் அழைக்கப்படுகிறதோ, அப்போது, இந்த டூவீலர் ஆம்புலன்ஸ்க்கு தகவல் தெரிவிக்கப்படும். அதன் பிறகு அந்த இடத்திற்கு சென்று அவர்களுக்கு முதலுதவி செய்யப்படும்.

அதற்குள் ஆம்புலன்ஸ் வந்துவிடும் என்பதால், அதன் பிறகு அவர்கள் மருத்துவமனைக்கு கொண்டு செல்லப்படுவர் என்பது குறிப்பிடத்தக்கது. இந்த டூவீலர் ஆம்புலன்ஸ் சேவை காலை 8 மணி முதல் இரவு 8 மணி வரை மட்டுமே இருக்கும் என்பது குறிப்பிடத்தக்கது.