May 16

என்னை பேச வைத்தவர் படையப்பா தான்: நீலாம்பரி ரம்யாகிருஷ்ணன்

சூப்பர் ஸ்டார் ரஜினி தான் என்னை முதன் முதலில் பேச வைத்தார் என்று நீலாம்பரி ரம்யா கிருஷ்ணன் தெரிவித்துள்ளார்.

பாகுபலி படத்தின் வெற்றியைத் தொடர்ந்து பாகுபலி2 வெற்றியும் ரம்யா கிருஷ்ணனனுக்கு பேரும் புகழும் சேர்த்துள்ளது. தற்போது 1000 கோடிக்கு மேல் வசூல் படைத்து வரும் இப்படம் பற்றி ரம்யா கிருஷ்ணன் கூறுகையில், படையப்பா படத்திற்கு முன்பு வரை என்னை யாரும் சொந்த குரலில் பேச அனுமதிக்கவில்லை. ஆனால், படையப்பா படத்தில் எனக்கு கொடுத்த நீலாம்பரி கதாபாத்திரத்திற்கு நான் தான் சொந்த குரலில் பேச வேண்டும் என்று படையப்பாவும், இயக்குனர் கே.எஸ்.ரவிக்குமாரும் சொன்னார்கள்.

ஆனால், படையப்பா படத்திற்கு என்னுடைய குரல் செட்டாகாது என்று பலர் சொன்னாலும், ரஜினி மற்றும் ரவிக்குமார் இருவரும் நான் தான் பேச வேண்டும் என்று பிடிவாதமாக இருந்தார்கள். அவர்கள் என் மீது வைத்த நம்பிக்கை எனக்கு நல்ல பெயரை கொடுத்தது. இந்த நேரத்தில் அவர்கள் இருவருக்கும் எனது நன்றியை தெரியப்படுத்திக் கொள்கிறேன்.

இதேபோலத்தான் பாகுபலி படத்திலும் நடந்தது. இப்படத்தில் நான் நடித்த சிவகாமி கதாபாத்திரத்திற்கு நான் தான் சொந்த குரலில் பேச வேண்டும் என்று இயக்குனர் ராஜமௌலியின் தந்தை விஜயேந்திர பிரசாத் கூறினார். என் மீது நம்பிக்கை வைத்த அவருக்கு நல்ல பலன் கிடைத்துள்ளது. பாகுபலி போன்ற பிரமாண்ட படத்தில் நான் நடிப்பேன் என்று ஒரு போது நினைத்து பார்த்ததும் கிடையாது.

ஆனால், அது நடந்துள்ளது என்று பெருமைபட கூறியுள்ளார். இதற்கு முன்னதாக நான் நடித்த படையப்பா தான் எனக்கு நீலாம்பரி என்ற பேர் வாங்கி கொடுத்தது. அதனைத் தொடர்ந்து தற்போது பாகுபலி படம் எனக்கு சிவகாமி தேவி என்ற பேர் வாங்கி கொடுத்திருக்கிறது என்று ரம்யா கிருஷ்ணன் பெருமையாக தெரிவித்துள்ளார்.