May 16

உலகக் கோப்பை கால்பந்து: ரூ.48 முதல் டிக்கெட்டுகள் விற்பனை

இந்தியாவில் நடைபெறவுள்ள 17 வயதுக்கு உட்பட்டோருக்கான உலகக் கோப்பை கால்பந்துத் தொடருக்கான டிக்கெட்டுகள் ரூ.48 முதல் விற்கப்படுகின்றன.

17 வயதுக்கு உட்பட்டோருக்கான உலகக் கோப்பை கால்பந்துத் தொடர் இந்தியாவில் நடக்கிறது. வரும் அக்டோபர் மாதம் 6ஆம் தேதி கொல்கத்தாவில் தொடங்குகிறது. இத்தொடருக்கான டிக்கெட் விற்பனை இன்று ஆரம்பமாகிறது.

1911ஆம் ஆண்டு ஐ.எஃப்.ஏ. கேடயத்தை வென்ற அணியின் கேப்டன் கவுரி பாபுரி முதல் டிக்கெட்டை பெற்றுக்கொண்டுள்ளார். அந்த டிக்கெட் மூலம் அவர் தன் குடும்பத்தினருடன் ஏதாவது ஒரு போட்டியை கண்டுகளிக்கலாம். ஸ்பெயின் நாட்டின் கால்பந்து வீரர் சார்லஸ் ப்யோல், இந்தியாவில் டிக்கெட் விற்பனைக்கான தூதுவராக செயல்படுவார்.

ஐந்து கட்டமாக நடக்கும் இந்த டிக்கெட் விற்பனையில் முதல் கட்டமாக மூன்றாம் தர டிக்கெட்டுகள் ரூ.48க்கு விற்கப்படுகின்றன. போட்டிகள் தொடங்கும் வரை மட்டுமே இந்த சலுகை விலையில் டிக்கெட்டுகள் கிடைக்கும். போட்டிகள் தொடங்கிய பிறகு இதே டிக்கெட்டுகளை ரூ.100க்கு விற்கப்படும்.

ஒரு மைதானத்தில் நடக்கும் போட்டிகள் அனைத்தையும் பார்வையிட விரும்புவோர் மொத்தமாக அனைத்து போட்டிகளுக்குமான டிக்கெட்டையும் வாங்கலாம். கொல்கத்தாவில் உள்ள சால்ட் லேக் மைதானத்தில் நடக்கும் பத்து போட்டிகளுக்கும் உரிய டிக்கெட்டுகளை மொத்தமாக ரூ.480 செலுத்தி வாங்க முடியும்.

மேலும், ரூ.800, ரூ.1600 விலை கொண்ட முதல் மற்றும் இரண்டாம் தர டிக்கெட்டுகள் விற்பனையும் அடுத்தடுத்து ஆரம்பமாகும்.