May 16

எங்கள் தரப்பில் முட்டுக்கட்டை இல்லை: ஓபிஎஸ்

அதிமுக இரு அணிகள் இணைவது தொடர்பாக எங்கள் தரப்பில் எந்த முட்டுக்கட்டையும் இல்லை என முன்னாள் முதல்வர் பன்னீர்செல்வம் தெரிவித்துள்ளார்.

தமிழக முதல்வராக இருந்த ஜெயலலிதா மறைவுக்கு பின்னர், சசிகலா அணி, பன்னீர்செல்வம் அணி என அதிமுக பிளவு கண்டுள்ளது. ரத்து செய்யப்பட்ட ஆர்கே நகர் இடைத்தேர்தலின் போது, அதிமுக கட்சி மற்றும் சின்னம் முடக்கப்பட்டது. தொடர்ந்து, அதிமுக புரட்சித் தலைவி அம்மா என்ற பெயரில் பன்னீர்செல்வம் அணியும், அதிமுக அம்மா என்ற பெயரில் எதிரணியினரும் செயல்பட்டு வருகின்றனர்.

இத்தகைய சூழலில், இரு அணிகளின் இணைப்பிற்கு அஸ்திவாரம் போடப்பட்டது. பேச்சுவார்த்தைக்கு இரு அணிகளின் சார்பிலும், குழுக்கள் அமைக்கப்பட்டதே தவிர, இதுவரை பேச்சுவார்த்தை நடைபெறவில்லை. எனினும், கட்சி மற்றும் சின்னத்தை மீட்க இரு அணிகளும் முனைப்பு காட்டி வருகின்றன.

பேச்சுவார்த்தை நடைபெறாமல் இருப்பதற்கு பல்வேறு காரணங்கள் கூறப்பட்டு வரும் நிலையில், இரு அணிகள் இணைவது தொடர்பாக எங்கள் தரப்பில் எந்த முட்டுக்கட்டையும் இல்லை என முன்னாள் முதல்வர் பன்னீர்செல்வம் தெரிவித்துள்ளார்.

சென்னை விமான நிலையத்தில் செய்தியாளர்களை சந்தித்த அவர் இதனை தெரிவித்தார். மேலும், போக்குவரத்து தொழிலாளர்கள் பிரச்சனையில் அரசு தனி கவனம் செலுத்தி பிரச்சனையை சுமூகமாக தீர்த்து வைக்க முயற்சி எடுக்க வேண்டும் எனவும் அவர் வலியுறுத்தியுள்ளார்.