May 16

விவசாயிகளின் பாதம் தொட்டு வணங்குகிறேன்: சந்திரபாபு நாயுடு

விவசாயிகளின் பாதம் தொட்டு வணங்குகிறேன் என ஆந்திர முதல்வர் சந்திரபாபு நாயுடு நெகிழ்ச்சி தெரிவித்துள்ளார்.

ஒருங்கிணைந்த ஆந்திர மாநிலம், பல்வேறு போராட்டங்களுக்கு பின்னர் , கடந்த காங்கிரஸ் ஆட்சியின் போது தெலங்கான, ஆந்திரா என இரண்டாகப் பிரிக்கப்பட்டது. அப்போது, தெலங்கானாவின் நிரந்தர தலைநகராக ஹைதராபாத் இருக்கும் என்றும், அதே வேளையில் அடுத்த 10 ஆண்டுகளுக்கு ஆந்திரா, தெலங்கானா மாநிலங்களுக்கு பொது தலைநகராக ஹைதராபாத் செயல்படும் என்றும் அறிவிக்கப்பட்டது.

இதனையடுத்து, ஆந்திர புதிய தலைநகர் நிர்மாணப் பணிகளுக்காக குழு அமைக்கப்பட்டது. விசாகப்பட்டினம், விஜயவாடா, குண்டூர், ஓங்கோல், திருப்பதி ஆகிய நகரங்களில் ஏதேனும் ஒன்று ஆந்திர மாநிலத்தின் புதிய தலைநகராக அமையும் என எதிர்பார்க்கப்பட்டது. ஆனால், கிருஷ்ணா நதிக்கரையின் ஓரத்தில் புதிய தலைநகருக்கான இடம் தேர்வு செய்யப்பட்டது. அதற்காக, விவசாய நிலங்கள் கையகப்படுத்தப்பட்டன.

மேலும் அமராவதியை தலைசிறந்த நகரமாக மாற்ற வேண்டும் என ஆந்திர முதல்வர் கடும் முயற்சிகளை எடுத்து வருகிறார். இதற்காக சிங்கப்பூர், அமெரிக்கா என பல்வேறு உலக நாடுகளுக்கு சுற்றுப்பயணம் மேற்கொண்டு சிறந்த தொழில்நுட்பங்களை கொண்டு வருகிறார்.

இந்நிலையில், அமராவதி நகரை உலகத் தரம் வாய்ந்த தலைநகரமாக உருவாக்குவேன். இதற்கு நிலம் வழங்கிய விவசாயிகளின் பாதத்தைத் தொட்டு வணங்குகிறேன். அவர்களது தியாகத்தால் தான் இன்று அமராவதி உயிர் பெற்றுள்ளது என நெகிழ்ச்சி தெரிவித்துள்ளார்.