May 16

கார்த்தி சிதம்பரம் வீட்டில் சோதனை; பீட்டர் முகர்ஜியாவின் முன்னாள் நிறுவனத்துடன் தொடர்பா?

அந்நிய செலவாணி குற்றச்சாட்டின் கீழ் முன்னாள் அமைச்சர் ப. சிதம்பரம் மற்றும் அவரது மகன் கார்த்தி சிதம்பரம் வீட்டில் இன்று காலை முதல் சிபிஐ அதிகாரிகள் சோதனை மேற்கொண்டு வருகின்றனர்.

வெளிநாட்டு ஊடகமான ஐஎன்எக்ஸ் மீடியாவின் முன்னாள் உரிமையாளர் பீட்டர் முகர்ஜியா. இவர் தற்போது ஷீனா போரா கொலை வழக்கில் சிறையில் உள்ளார். கடந்த 2008ஆம் ஆண்டில், ஐஎன்எக்ஸ் மீடியா கார்த்தியின் அட்வான்டேஜ் ஸ்ட்ரடஜிக் நிறுவனத்துக்கு பங்குகள் ஒதுக்கி, நிதி கொடுத்ததாக குற்றச்சாட்டு எழுந்துள்ளது.

அப்போது இந்த மீடியாவின் உரிமையாளராக இருந்த பீட்டர் முகர்ஜியா பல்வேறு தவணைகளாக பணத்தை அளித்துள்ளதாக கூறப்படுகிறது. மேலும், லண்டனில் இருக்கும் ஆர்ட்வியா டிஜிடல் நிறுவனம் கார்த்தி நிறுவனத்துக்கு ரூ. 60லட்சம் பங்குகளை வழங்கியுள்ளது.

இந்த குற்றச்சாட்டுகளின் கீழ்தான் இன்று கார்த்தி மற்றும் அவரது தந்தை சிதம்பரம் வீட்டில் சோதனை நடப்பதாக தகவல் வெளியாகியுள்ளது.இதற்கு முன்னதாக கார்த்தி வீட்டில் வருமான வரித்துறை சோதனை நடத்தியபோது இதுதொடர்பான ஹார்டு டிஸ்குகள் கிடைத்துள்ளன. இதுதொடர்பாக நடத்தப்பட்ட விசாரணையில், மத்திய அமைச்சராக ப. சிதம்பரம் இருந்தபோது, இதுதொடர்பான ஆவணங்கள் அனுமதிக்காக வைக்கப்பட்டுள்ளது.

ஆனால், அப்போது அனுமதி கொடுக்கப்படவில்லை என்ற செய்தி வெளியாகியுள்ளது. 2008, செப்டம்பர் 22ஆம் தேதி, ஐஎன்எக்ஸ் மீடியாவிடம் இருந்து கார்த்தியின் நிறுவனத்திற்கு ரூ. 35 லட்சம் நிதியாக வந்துள்ளது. அன்றே, ஐஎன்எக்ஸ் மீடியாவிடம் இருந்து நார்த்ஸ்டார் சாப்ட்வேர் சொல்யூசன்ஸ் நிறுவனத்துக்கு ரூ. 60 லட்சம் சென்றுள்ளது.

மேலும் வெளியான ஒரு தகவலில், அந்நிய செலாவணி சட்டத்தின் கீழ் ரூ. 4 கோடி மட்டுமே பெற ஐஎன்எக்ஸ் அனுமதி பெற்று, பின்னர் ரூ. 350 கோடியை பெற்றதாக தற்போது குற்றச்சாட்டு எழுந்துள்ளது. இதில் கார்த்திக்கு பங்கு இருப்பதாக குற்றச்சாட்டு எழுந்துள்ளது.

கடந்த ஏப்ரல் மாதம் அமலாக்கத்துறை கார்த்திக்கு நோட்டீஸ் அனுப்பியது. அந்த நோட்டீசில், ரூ.45 கோடி அளவுக்கு கார்த்தி அந்நிய செலாவணி மோசடி செய்து இருப்பதாக குறிப்பிட்டு இருந்தது.

வாசன் ஹெல்த் கேர் ஆகிய நிறுவனம் ரூ. 2 ஆயிரத்து 262 கோடி அன்னிய செலாவணி மோசடி செய்துள்ளதாகவும், இதிலும் கார்த்திக்கு தொடர்பு இருப்பதாக குறிப்பிட்டு இருந்தது. இந்த குற்றச்சாட்டுகளின் கீழ் ஏற்கனவே சென்னையில் கார்த்தியின் வீடு மற்றும் அலுவலகங்களில் சோதனை நடத்தப்பட்டுள்ளது. இத்துடன் கார்த்தி மீதான ஏர்செல் மேக்சிஸ் வழக்கும் நிலைவையில் உள்ளது.

இதன் அடிப்படையில் அமலாக்கத் துறை ஏற்கனவே கார்த்தி சிதம்பரம் மற்றும் வாசன் ஹெல்த் கேர் நிறுவனத்திற்கு நோட்டீஸ் அனுப்பி இருந்தது. ஆனால், இன்றைய சோதனைக்கும், இதற்கும் தொடர்பு இல்லை என்றே கூறப்படுகிறது.