Mar 09

தமிழகத்தில் கைதான இலங்கை மீனவர்கள் 23 ஆம் திகதி வரை விளக்கமறியலில்

தமிழகத்தின் நாகையில் நேற்று முன்தினம் கைது செய்யப்பட்ட இலங்கை மீனவர்கள் 10 பேரை வரும் 23ம் தேதி வரை நீதிமன்ற காவலில் வைக்க சென்னை எழும்பூர் நீதிமன்றம் உத்தரவிட்டுள்ளது.

எல்லை மீறி மீன்பிடித்ததாக நேற்று நாகையில் கடலோர காவல்படையால் இலங்கை மீனவர்கள் 10 பேர் கைது செய்யப்பட்டனர். அவர்கள் இன்று எழும்பூர் தலைமை பெருநகர குற்றவியல் நடுவர் நீதிமன்றத்தில் ஆஜர்படுத்தப்பட்டனர்.

அப்போது கடலோர காவல்படையும், தமிழக போலீசாரும் தங்களை கண்ணியமாக நடத்தியதாக இலங்கை மீனவர்கள், நீதிபதியிடம் தெரிவித்தனர். இதையடுத்து கைது செய்யப்பட்ட மீனவர்களை வரும் 23-ம் தேதி வரை நீதிமன்ற காவலில் வைக்க நீதிபதி சந்திரன் உத்தரவிட்டார்.

நீதிமன்றத்தில் இருந்து வெளியே வந்த பின் செய்தியாளர்களிடம் பேசிய இலங்கை மீனவர்கள், மீனவர்களான தங்களுக்குள் பேதமில்லை என்றும், தமிழக மீனவர்களுடன் இணைந்து இலங்கை மீனவர்கள் கூட்டாகதான் கடலில் மீன் பிடிப்பதாகவும் தெரிவித்தனர்.