May 14

நேபாள உள்ளாட்சித் தேர்தல் வாக்குப்பதிவு தொடங்கியது

கடும் எதிர்ப்புகளுக்கு மத்தியில் நேபாள உள்ளாட்சித் தேர்தலுக்கான முதற்கட்ட வாக்குப்பதிவு இன்று காலை தொடங்கியது.

நேபாள நாட்டு உள்ளாட்சி அமைப்புகளுக்கு மே 14-ம் தேதி (இன்று) தேர்தல் நடத்த அந்நாட்டு அரசு திட்டமிட்டது. ஆனால், இந்த தேர்தலுக்கு மாதேசி கட்சிகள் கடும் எதிர்ப்பு தெரிவித்து வந்தன. மாகாண எல்லை தொடர்பான மறு வரையறை உள்ளிட்ட அவர்களது கோரிக்கைகளை நிறைவேற்றுவது தொடர்பாக புதிய அரசியலமைப்பு சட்டத்தில் திருத்தம் கொண்டுவந்த பிறகே தேர்தலை நடத்த வேண்டும் என அவர்கள் கூறி வந்தனர்.

அதேசமயம், மாதேசி முன்னணியின் கோரிக்கைகள் அடுத்த நாடாளுமன்றத் தேர்தலின்போது நிறைவேற்றப்படும். உள்ளாட்சித் தேர்தல், மே 14-ம் தேதி (இன்று) திட்டமிட்டபடி நடக்கும் என நேபாள பிரதமர் பிரசண்டா தெரிவித்திருந்தார்.

இந்நிலையில், கடும் எதிர்ப்புகளுக்கு மத்தியில் நேபாள உள்ளாட்சித் தேர்தலுக்கான முதற்கட்ட வாக்குப்பதிவு இன்று காலை தொடங்கியது. சுமார் 6,642 வாக்குச்சாவடிகளில் இந்த வாக்குப்பதிவானது தொடங்கி நடைபெற்று வருகிறது.

நேபாளம், உள்ளாட்சித் தேர்தலை நடத்த இந்தியா ஆதரவு அளித்துள்ளது. சீன அரசாங்கமும் ஒரு மில்லியன் டாலர் கொடுப்பதாக கூறியுள்ளது என்பது கவனிக்கத்தக்கது.

நேபாளத்தில் புதிய அரசியலமைப்பு பிரகடனப்படுத்தப்பட்டதற்கு எதிர்ப்பு தெரிவித்து மாதேசி சமுகத்தினர் 2015-ஆம் ஆண்டு செப்டம்பர் மாதம் முதல் கடந்த ஆண்டு பிப்ரவரி வரை தொடர்ந்து போராட்டங்கள் நடத்தினர். இப்போராட்டத்தின்போது நடந்த வன்முறையில் ஏராளமானோர் உயிரிழந்தனர்.

தற்போது நேபாளத்தில் மன்னராட்சி முறை ஒழிக்கப்பட்டு ஜனநாயக ஆட்சி நடைபெற்று வருகிறது என்பது குறிப்பிடத்தக்கது.