May 13

ஸ்டாலினுக்கு நன்றி; அனைத்து தலைவர்களையும் சந்திப்பேன்: ராஜமீனாட்சி

திமுக செயல் தலைவரும், எதிர்க்கட்சித் தலைவருமான ஸ்டாலினை நேரில் சந்தித்து நன்றி தெரிவித்த தருமபுரி மாவட்ட குழந்தை பாதுகாப்பு அதிகாரி ராஜமீனாட்சி, அனைத்து தலைவர்களையும் சந்திக்க திட்டமிட்டுள்ளதாக தெரிவித்துள்ளார்.

பணியிட மாற்றத்திற்கு ரூ.30 லட்சம் லஞ்சம் கேட்டு சமூக நலத்துறை அமைச்சர் சரோஜா மிரட்டல் விடுப்பதாக தருமபுரி மாவட்ட குழந்தைகள் பாதுகாப்பு அலுவலர் ராஜமீனாட்சி அண்மையில் குற்றம் சாட்டியிருந்தார்.

இந்நிலையில், திமுக தலைமை அலுவலகமான சென்னை அண்ணா அறிவாலயத்தில் அக்கட்சியின் செயல் தலைவரும், எதிர்க்கட்சித் தலைவருமான ஸ்டாலினை ராஜமீனாட்சி சந்தித்தார்.

தொடர்ந்து, செய்தியாளர்களை சந்தித்த அவர், அமைச்சர் மீது கொடுக்கப்பட்ட புகாரானது லஞ்ச ஒழிப்பு துறைக்கு மற்றப்பட்டுள்ளது என காவல்துறை அதிகாரிகள் தெறிவித்தாக குறிப்பிட்டார். மேலும், எனக்கு ஆதரவு தெரிவித்து, இதுகுறித்து நடவடிக்கை எடுக்க வலியுறுத்திய எதிர்க்கட்சித் தலைவருக்கு இந்த சந்திப்பின் போது நன்றி தெரிவித்ததாகவும் ராஜமீனாட்சி தெரிவித்தார்.

அதேபோல், அனைத்து தலைவர்களையும் சந்தித்து தனக்கு ஆதரவு தெரிவித்தமைக்கு நன்றி தெரிவிக்க உள்ளதாகவும் அவர் தெரிவித்தார்.

மேலும் அவர் கூறுகையில், என்னை போல் யாரும் பாதிக்கப்பட்டு விடக்கூடாது என்ற எண்ணத்தில் தான் புகார் அளித்தேன். என்னை போன்று அனைத்து மாவட்டங்களில் இருக்கும் அலுவலர்களுக்கும் சேர்த்து தான் நான் போராடி வருகிறேன் என்றும் அவர் கூறினார்.