May 12

மாலை, சால்வை வேண்டாம்; அதைவிட முக்கியம் என் காலில் யாரும் விழவே கூடாது: ரசிகர்களுக்கு ரஜினிகாந்த் அட்வைஸ்

‘’ரசிகர்கள் யாரும் எனக்கு மாலை, சால்வை ஏதும் அணிவிக்கக்கூடாது.. அதைவிட முக்கியமாக என் காலில் விழுந்து ஆசிபெறக்கூடாது,’’ என்று நடிகர் ரஜினிகாந்த் தெரிவித்துள்ளார்.

தற்போது, தமிழ்நாட்டில் உள்ள திருச்சி, நெல்லை, ராமநாதபுரம், சிவகங்கை, கடலூர், பாண்டிச்சேரி, காரைக்கால், கரூர், சிதம்பரம், பெரம்பலூர், திண்டுக்கல், திருவாரூர் என்று 17 மாவட்டங்களில் இருக்கும் ரசிகர்களை மட்டுமே சந்திக்கிறார்.

பெரிய மாவட்டத்தில் தலா 250 ரசிகர்களையும் சிறிய மாவட்டத்தில் தலா 200 ரசிகர்களையும் சந்தித்து போட்டோ எடுத்துக்கொள்கிறார். சென்னை, கோவை, மதுரை உள்ளிட்ட 15 மாவட்ட ரசிகர்களை, ஜூன் மாதம் சந்தித்து போட்டோ எடுத்துக்கொள்ளத் திட்டமிட்டிருப்பதாகச் சொல்கிறார்கள்.

மே 15-ம் தேதி, வெளியூரில் இருந்து சென்னைக்கு வரும் ரசிகர்கள், காலை 7 மணிக்கே ஸ்ரீராகவேந்திரா மண்டபத்துக்கு வருமாறு சொல்லி இருக்கிறார்கள். காலை 7 மணிக்கு வரும் அனைத்து ரசிகர்களுக்கும் ராகவேந்திரா கல்யாண மண்டபத்தில் சிற்றுண்டி பரிமாறப்படும். சரியாக காலை 9 மணிக்கு வரும் ரஜினிக்கு, தனது ரசிகர்களுடன் சேர்ந்து ஆலோசனையோ, கலந்துரையாடலோ செய்யும் எண்ணம் துளியும் இல்லை.

இந்த நிகழ்ச்சியின்போது, ரசிகர்கள் யாரும், சால்வை அல்லது மாலை அணிவிக்கக்கூடாது என்றும், காலில் விழுந்து ஆசிபெறக்கூடாது என்றும் ரஜினிகாந்த் அன்புக்கட்டளை இட்டுள்ளாராம்.

மேலும், இந்த ரசிகர்கள் சந்திப்பின்போது, அனைவருடனும், போட்டோ மட்டுமே எடுத்துக் கொள்ள ரஜினி விரும்புகிறாராம்.

இது மட்டுமின்றி, ரசிகர்கள் கூட்டத்தை சமாளிக்கும் வகையில், ஒவ்வொரு மாவட்டந்தோறும், ரசிகர் மன்றங்கள் வழியாக, ரசிகர்களை தேர்வு செய்து, அவர்களின் புகைப்படம் போட்ட அடையாள அட்டையை அச்சிட்டு, அவர்களுக்கு வழங்கியுள்ளதாகவும், இந்த அடையாள அட்டை வைத்திருப்பவர்கள் மட்டுமே மே 15ம் தேதி நடைபெறும் ரசிகர்கள் சந்திப்பில் பங்கேற்க முடியும் எனவும், தகவல்கள் தெரிவிக்கின்றன.

மே மாதம் 15ம் தேதி, ரசிகர்களை சூப்பர் ஸ்டார் ரஜினிகாந்த் சந்திக்க உள்ளார். இதற்காக, ராகவேந்திரா மண்டபத்தில் பிரமாண்ட ஏற்பாடுகள் நடைபெற்று வருகின்றன.