May 10

தென்கொரிய அதிபர் தேர்தல்: மூன் ஜே இன் அமோக வெற்றி..!

தென் கொரிய அதிபர் தேர்தலில் ஜனநாயக கட்சியைச் சேர்ந்த மூன் ஜே இன் அதிக வாக்குகள் வித்தியாசத்தில் வெற்றி பெற்றுள்ளார்.

தென்கொரியாவின் முதல் பெண் அதிபராக இருந்த பார்க் குன் ஹை மீது சாம்சங் மற்றும் லாட்டி குழுமத்திடம் லஞ்சம் வாங்கியது தொடர்பான குற்றச்சாட்டு எழுந்தது. இதையடுத்து, அவர் தனது பதவியை ராஜினாமா செய்தார். இதனைத் தொடர்ந்து அந்நாட்டில் அதிபரை தேர்ந்தெடுப்பதற்கான தேர்தல் வாக்குப்பதிவு நேற்று நடைபெற்றது.இந்நிலையில் தென்கொரிய அதிபர் தேர்தலுக்கான முடிவுகள் இன்று வெளியாகின. இதில் 41.08 சதவீத வாக்குகள் பெற்று ஜனநாயக கட்சியைச் சேர்ந்த மூன் ஜே இன் வெற்றி பெற்றார். இரண்டாவது இடத்தை 24.03 சதவீத வாக்குகள் பெற்ற கொரிய சுதந்திர கட்சி வேட்பாளர் ஹாங் ஜுன் ப்யோவும் ,மூன்றாவது இடத்தை 21.41 சதவீத வாக்குகளுடன் மக்கள் கட்சியைச் சேர்ந்த ஆன் சியோல் சூவும் பிடித்துள்ளனர்.


தான் அதிபராக தேர்ந்தெடுக்கப்பட்டால் வட கொரியாவுடன் அமைதி பேச்சுவார்த்தை தொடங்கப்படும் என மூன் ஜே இன் அறிவித்திருந்தார். தற்போது அவரே அதிபர் தேர்தலில் வெற்றி பெற்றிருப்பதால், கொரிய தீபகற்பத்தில் நிலவும் போர் அபாயத்தை மாற்றியமைக்கும் சூழல் ஏற்படும் என அரசியல் விமர்சகர்கள் கருதுகின்றனர்.

மேலும் அதிபராக தேர்ந்தெடுக்கப்பட்டுள்ள ஜே இன், அமெரிக்க எதிர்ப்பு கொள்கையை உடையவர் என்பதால் தென் கொரிய கடல் பகுதிகளில் ஆதிக்கம் செலுத்தி வரும் அமெரிக்காவுக்கு இது ஒரு பின்னடைவாகவே கருதப்படுகிறது.