May 09

ஜெயலலிதா கார் டிரைவர் மற்றும் விஜயபாஸ்கரின் நண்பர் மர்ம மரணம்: நீதிபதி விசாரணைக்கு திமுக வலியுறுத்தல்

ஜெயலலிதாவின் கார் டிரைவர் மற்றும் அமைச்சர் விஜயபாஸ்கரின் நண்பர் ஆகியோரின் மர்ம மரணம் பற்றி உயர்நீதிமன்ற நீதிபதி விசாரிக்க வேண்டும் என்று, திமுக வலியுறுத்தியுள்ளது.

முன்னாள் முதல்வர் ஜெயலலிதாவின் மரணத்தை தொடர்ந்து, தமிழகத்தில் பல அதிரடி அரசியல் நிகழ்வுகள் நடைபெற்று வருகின்றன. இதன் ஒருபகுதியாக, சில நாட்கள் முன்பு ஜெயலலிதாவின் கார் டிரைவர் கனகராஜ் மர்மமான முறையில், சாலை விபத்து ஒன்றில் உயிரிழந்து கிடந்தார்.

இதேபோன்று, தமிழக அமைச்சர் விஜயபாஸ்கரின் நண்பரும், தமிழக அரசின் ஒப்பந்ததாரருமான சுப்ரமணியம் என்பவர் நேற்று மர்மமாக உயிரிழந்துள்ளார்.இவர்கள் 2 பேரும் முக்கியமான குற்ற வழக்குகளில், சாட்சியாகக் கருதப்படுகிறார்கள்.

இந்நிலையில், 2 பேரும் தற்கொலை செய்துகொண்டது பற்றி, உயர்நீதிமன்ற நீதிபதி தலைமையில் விசாரணை நடத்த வேண்டும் என்று, திமுக தலைவர் மு.க.ஸ்டாலின் வலியுறுத்தியுள்ளார்.

அவர் கூறுகையில், ‘’மரணமடைந்த 2 பேரும், சில முக்கியமான குற்ற வழக்குகளின் சாட்சியாகக் கருதப்படுகின்றனர். யாரோ சிலரை காப்பாற்ற இவர்கள் மர்மமான முறையில் கொலை செய்யப்பட்டுள்ளதாக, சந்தேகிக்கிறோம்.

இதுகுறித்து, உயர்நீதிமன்ற நீதிபதி ஒருவரின் தலைமையில் விசாரணை நடத்த வேண்டும்,’’ என தெரிவித்துள்ளார்.