May 08

பிறந்த நாள், வைர விழாவிற்கு ரெடியான கருணாநிதி; விரைவில் தொண்டர்களுடன் சந்திப்பு

வரும் ஜூன் 3ஆம் தேதி திமுக தலைவர் கருணாநிதி தொண்டர்களை சந்திக்க உள்ளதாக தெரிவிக்கப்பட்டுள்ளது.
உடல்நலக்குறைவால் பாதிக்கப்பட்டு, கடந்த சில மாதங்களாக திமுக தலைவர் கருணாநிதி சிகிச்சை பெற்று வருகிறார். கடந்த ஆண்டு டிசம்பர் மாதத்திற்கு பின்னர், தொண்டர்கள் யாரையும் சந்திக்கவில்லை.

இந்நிலையில் வரும் ஜூன் 3ஆம் தேதி, கருணாநிதியின் 94வது பிறந்தநாள் விழா கொண்டாடப்படுகிறது. அதுமட்டுமல்லாமல் கருணாநிதி எம்.எல்.ஏவாக பதவியேற்று, 60 ஆண்டுகள் நிறைவடைந்துள்ளன.

அதற்காக வைர விழா கொண்டாட்டத்திற்கு ஏற்பாடு செய்யப்பட்டு வருகிறது. இரண்டு நிகழ்வுகளையும் சேர்த்து, பிரம்மாண்ட விழாவாக நடத்த முடிவு செய்யப்பட்டுள்ளது.

இந்த விழா சென்னை ராயப்பேட்டை ஒய்.எம்.சி.ஏ மைதானத்தில் நடைபெறும் என்று தெரிவிக்கப்பட்டுள்ளது. அங்கு நடைபெறும் விழாவில் கருணாநிதி தொண்டர்களை சந்திக்க உள்ளார் என்று கூறப்பட்டுள்ளது.

பல மாதங்களுக்கு பிறகு பொது நிகழ்ச்சியில் கலந்து கொள்ள இருப்பதால், திமுக தொண்டர்கள் உற்சாகத்தில் உள்ளனர். அந்த விழாவில் பல்வேறு மாநில முதலமைச்சர்களுக்கு அழைப்பு விடுக்கப்பட்டுள்ளது.

இதுதொடர்பாக அறிவிப்பை திமுக அமைப்பு செயலாளர் ஆர்.எஸ்.பாரதி இன்று வெளியிட்டார்.