Oct 28

ஐந்து மாதங்களாக கடலில் தத்தளித்த பெண்கள்.!நிஜ வாழ்வில் ஒரு லைஃப் ஆஃப் பை.!

அமெரிக்காவை சேர்ந்த இரண்டு பெண்கள், அமெரிக்காவிற்கும் தைவானுக்கும் இடையே இருக்கும் கடல் பகுதியில், திசை தெரியாமல் கடந்த ஐந்து மாதங்களாக கடலிலேயே மாட்டிக்கொண்ட சம்பவம், வியப்பில் ஆழ்த்தியுள்ளது.

அமெரிக்காவை சேர்ந்த ஜெனிபர் மற்றும் டாஷா, என்ற பெண்கள், கடந்த மே மாத தொடக்கத்தில், விடுமுறையை கழிப்பதற்காக அமெரிக்காவில் இருந்து பசுபிக் கடலில் இருக்கும் 'தஹிதி' தீவுக்கு செல்ல முடிவெடுத்துள்ளனர்.

வித்தியாசமாக விடுமுறையை கொண்டாட நினைத்த இவர்கள், சொந்தமாக சிறிய ரக கப்பல் ஒன்று வாங்கி அதில் சென்று இருக்கின்றனர். ஆனால் இந்த கப்பல் தஹிதி தீவுக்கு செல்லும் வழியில், பாதியிலேயே வேலை செய்யாமல் நின்று விட்டது. இந்த நிலையில் அவர்கள் கைகளால் துடுப்பு போட்டு அப்படியே கரைக்கு சென்று விடலாம் என முடிவு செய்து துடுப்பு போட்டு இருக்கிறார்கள்.

ஆனால் அவர்கள் சென்ற கப்பலின் திசை மாறி, அதற்கு எதிர் திசையில் இருக்கும் தைவான் கடல் பகுதிக்கு சென்று விட்டது.இதன் காரணமாக, கடந்த ஐந்து மாதங்களாக நடுக்கடலில் தத்தளித்து இருக்கின்றனர். இவர்கள் அழைத்து சென்ற நாயும், இவர்களுடன் மாட்டிக் கொண்டு விட்டது.கடலில் உணவு, குடிநீர் இல்லாமல் இவர்கள் மிகவும் கஷ்டப்பட்டு இருக்கின்றனர்.

இந்த நிலையில் இரண்டு நாட்களுக்கு முன்பு தைவான் கடல் எல்லையில் மீன் பிடித்துக் கொண்டிருந்த மீனவர்கள் இவர்களை மீட்டு, தைவான் கடல்துறைக்கு தகவல் அளித்துள்ளனர். பின்னர், அமெரிக்க கப்பல்துறைக்கு தகவல் அளிக்கப்பட்டு இவர்கள் காப்பாற்றப்பட்டனர்.

இந்த நிலையில் நேற்று மீட்கப்பட்ட இரண்டு பெண்களும் மருத்துவமனையில் அனுமதிக்கப்பட்டு இருக்கின்றனர். இவர்கள் அமெரிக்க கப்பல் படைக்கும், தைவான் மீனவர்களுக்கும் நன்றி தெரிவித்து இருக்கின்றனர். மேலும் இவர்களுக்கு நடந்த இந்த இந்த சம்பவம் சில வருடங்களுக்கு முன்பு ஆஸ்கர் வாங்கிய 'லைஃப் ஆப் பை' படத்தின் கதை போலவே இருப்பதாக கூறப்படுகிறது.