Oct 05

ஐபோனுக்கு டாட்டா சொல்லுங்க! வந்தாச்சு கூகுள் பிக்ஸல்!

கூகுள் நிறுவனத்தின் பிக்ஸல் 2 மற்றும் பிக்ஸல் 2 எக்ஸ்.எல். ஸ்மார்ட்போன்கள் அறிமுகமாகியுள்ளன.

கூகுள் நிறுவனம் கடந்த ஆண்டு பிக்ஸல் என்ற பெயரில் புதிய ஸ்மார்ட்போன்களை களமிறக்கியது. ஆப்பிள் ஐபோன்கள் விற்பனையில் மண்ணை வாரிப்போடும் கூகுளின் இந்த அதிரடி நுழைவுக்கு வாடிக்கையாளர்கள் அமோக வரவேற்பு அளித்துள்ளனர்.

இதன் தொடர்ச்சியாக பிக்ஸல் 2 (Pixel 2) மற்றும் பிக்ஸல் 2 எக்ஸ்.எல், (Pixel 2 XL) என்ற இரு புதிய மாடல் ஸ்மார்ட்போன்களை கூகுள் நிறுவனம் புதன்கிழமை அறிமுகம் செய்தது.

இந்த இரண்டு மொபைல்களும் புத்தம் புதிய ஆண்ட்ராய்ட் ஓரியோ இயங்குதளம் கொண்டவை. இரண்டிலும் குவால்காம் ஸ்னாப்டிராகன் 835 பிராசெஸர் மற்றும் 4GB RAM இருக்கிறது. இரண்டுமே 64GB ROM மற்றும் 128GB ROM வேரியண்ட்களில் கிடைக்கும்.

இரண்டு மொபைல்களும் பக்காவான கேமராக்கள் உள்ளன. பின்புற கேமரா 12.2MP மற்றும் செல்ஃபி கேமரா 8MP.பேட்டரியில் இரண்டு மொபைல்களிலும் சிறு மாறுபாடு உள்ளது. பிக்ஸல் 2 மொபைலின் பேட்டரி 2700 mAh திறன் கொண்டது. பிக்ஸல் 2 எக்ஸ்.எல். பேட்டரி 3520 mAh திறன் உடையது. இரண்டுமே குறைந்தபட்சம் ஒரு நாள் முழுக்க நீடிக்கும் சக்தி உடையவை.

பிக்ஸல் 2 5 இன்ச் முழுமையான எச்.டி. தொடுதிரை உடையது. பிக்ஸல் எக்ஸ்.எல். 6 இன்ச் குவாட் எச்.டி. தொடுதிரை கொண்டது. இரண்டிற்கும் கொரில்லா கிளாஸ் பாதுகாப்பு இருக்கிறது.

அமெரிக்காவில் பிக்ஸல் 2 விலை 649 டாலர் (இந்திய மதிப்பில் சுமார் 43,000 ரூபாய்) எனவும் பிக்ஸல் 2 எக்ஸ்.எல். விலை 849 டாலர் (இந்திய மதிப்பில் சுமார் 56,000 ரூபாய்) எனவும் நிர்ணயிக்கப்பட்டுள்ளது.