Oct 02

மழைநீரை சேகரிக்கும் புதிய தொழில்நுட்பம் சென்னையில் அறிமுகம்.!

இந்தியாவிலேயே முதன்முறையாக மழைநீரை சேகரிக்க ஜப்பான் தொழில்நுட்பத்தில், 6 லட்சம் லிட்டர் கொள்ளளவு கொண்ட பிரம்மாண்டமான கீழ்நிலைத் தொட்டி சென்னை தரமணியில் கட்டப்பட உள்ளது.

சென்னை மக்களின் குடிநீர் தேவையைப் பூர்த்தி செய்ய நகரின் பல பகுதிகளில் பிரமாண்டமான கீழ்நிலைத் தொட்டி கட்ட வேண்டிய அவசியம் ஏற்பட்டுள்ளது. இதற்கு முன்னோடியாக, இந்தியாவில் முதல்முறையாக சென்னை தரமணியில் உள்ள பொதுப்பணித் துறை வளாகத்தில் ஜப்பான் நிதி மற்றும் தொழில்நுட்ப உதவியுடன் கூடிய 6 லட்சம் லிட்டர் கொள்ளளவு கொண்ட பிரமாண்டமான கீழ்நிலைத் தொட்டி கட்டப்படுகிறது. ஒரு கோடி செலவில் உருவாகும் இதன் கட்டுமான பணிக்கு முதலமைச்சர் பழனிச்சாமி அடிக்கல் நாட்டி தொடங்கி வைத்தார்.

92 அடி நீளத்திலும், 37 அடி அகலத்திலும், 10 அடி ஆழத்திலும் கட்டப்படுகிற தொட்டிக்குள் 2 அடிக்கு ஒன்று வீதம் 600 பிளாஸ்டிக் தூண்கள் அமைக்கப்படுகின்றன. இந்தத் தூண்களின் அடிப்பகுதி மற்றும் மேல்பகுதி ஜப்பானில் இருந்து இறக்குமதி செய்யப்பட்டுள்ளது. 36 ஆயிரம் சதுர அடியில் கட்டப்பட்டுள்ள அடுக்குமாடி கட்டிடங்களில் பெய்யும் மழைநீர் இத்தொட்டியில் சேகரிக்கப்படும்.

சென்னை தரமணி பொதுப்பணித் துறை வளாகம் 10 ஏக்கரில் அமைந்துள்ளது. இங்கு 250 பேர் பணியாற்றுகின்றனர். ஒருவருக்கு தினமும் 45 லிட்டர் தண்ணீர் தேவை. ஓராண்டில் விடுமுறையைக் கழித்தது போக மீதமுள்ள 250 நாட்களுக்கு 27 லட்சம் லிட்டர் தண்ணீர் தேவைப்படுகிறது.

இத்தொட்டியில் சேமிக்கப்படும் தண்ணீர் அங்குள்ள அரசு அதிகாரிகள், ஊழியர்கள் பயன்பாட்டுக்கு மட்டுமல்லாமல் அப்பகுதி மக்களின் குடிநீர் தேவை யைப் பூர்த்தி செய்யவும் பயன்படுத்தப்படவுள்ளது. இதற்காக “வாட்டர் ஏடிஎம்” என்ற கட்டமைப்பும் உருவாக்கப்படுகிறது. மேலும், இதுபோன்ற பிரம்மாண்டமான மழைநீர் சேகரிப்புத் தொட்டிகள் தமிழகம் முழுவதும் உள்ள அரசு அலுவலகங்கள், மருத்துவமனைகள், தகவல் தொழில்நுட்ப நிறுவனங்களில் கட்டப்படவுள்ளது குறிப்பிடத்தக்கது.