Sep 15

அகிம்சையை உலகுக்கு போதித்த தியாகி திலீபன் உண்ணாவிரதம் துவங்கிய நாள் இன்று!

பார்த்திபன் இராசையா என்னும் இயற்பெயர் கொண்ட திலீபன் நவம்பர் 27,1963-ம் ஆண்டு யாழ்ப்பாணத்தில் உள்ள ஊரெழு கிராமத்தில் பிறந்தவர். இவர் விடுதலைப்புலிகள் இயக்கத்தில் உறுப்பினராக இருந்தவர். பிராந்திய அரசியல் துறை பொறுப்பாளராகவும் இருந்தவர். இவர், கடந்த 1987 ம் ஆண்டு இலங்கையில் மையம் கொண்டிருந்த இந்திய அமைதிப்படையினரிடம் ஐந்து அம்சக் கோரிக்கைகளை முன்வைத்து உண்ணாவிரதம் துவங்கிய நாள் இன்று.

பயங்கரவாதத் தடைச்சட்டத்தின் கீழ் கைது செய்யப்பட்டு இன்னமும் தடுப்புக்காவலில் அல்லது சிறைகளில் உள்ளோர் விடுவிக்கப்படவேண்டும்.

புனர்வாழ்வு என்ற பெயரில் தமிழர் தாயகத்தில் நடத்தப்படும் சிங்களக் குடியேற்றங்கள் உடனடியாக நிறுத்தப்பட வேண்டும்.

இடைக்கால அரசு நிறுவப்படும் வரை புனர்வாழ்வு என்று அழைக்கப்படும் சகல வேலைகளும் நிறுத்தப்பட வேண்டும்.

வடகிழக்கு மாகாணங்களில் காவல் நிலையங்கள் திறக்கப்படுவது உடனடியாக நிறுத்தப்பட வேண்டும்.

இந்திய அமைதிப்படையின் மேற்பார்வையில் ஊர்காவல் படை என அழைக்கப்படுவோருக்கு வழங்கப்பெற்ற ஆயுதங்கள் திரும்பப்பெறப்பட்டு தமி்ழ்க்கிராமங்கள், பள்ளிக்கூடங்களில் குடி கொண்டுள்ள இராணுவ , போலீஸ் நிலையங்கள் மூடப்படவேண்டும்.

என்ற ஐந்து அம்சக் கோரிக்கைகளை முன்வைத்து 1987 செப்டம்பர் 15 ம் உண்ணாவிரதம் துவங்கி, 1987 செப்டம்பர் 26 ம் தேதி சனிக்கிழமை காலை 10.48 மணிக்கு திலீபன் வீர மரணம் எய்தினார்.

இந்த உண்ணாவிரதம் வேண்டாம் என்று மறுத்த விடுதலைப் புலிகளின் தலைவர் பிரபாகரனிடம் தியாகி திலீபன் கூறிய வார்த்தைகள் ” நமது கொள்கையின் தீவிரத்தை நிரூபிக்க இதை விட்டால் வேறு வழியில்லை.

நாம் இந்திய – இலங்கை ஒப்பந்தத்தை ஏற்கவில்லை என்பதை ஈழ மக்களுக்கும், தமிழக மக்களுக்கும், உலகத் தமிழர்களுக்கும் சொல்லிய வேண்டிய தருணம் இது. இன்னொரு ராணுவம் எங்கள் மண்ணில் நிலைகொள்வதை ஏற்றுக்கொள்ள மாட்டோம் என்பதையும் அழுத்தமாக சொல்ல வேண்டிய தருணம். அதையும் இந்தியாவின் வழியிலேயே சொல்ல உண்ணாவிரதம்தான் ஒரே வழி ” என்று சொல்லி ஒப்புதல் பெற்றார்.

தம் மக்களுக்காக ஒரு சொட்டு நீர்- உணவு அருந்தாமல் 12 நாள்கள் இருந்து உயிர்துறந்து உலகுக்கே உண்ணா நோன்பின் மகத்துவத்தை சொன்னவர் திலீபன். ஆம் பார்த்திபன் இன்னும் பசியோடுதான் இருக்கிறான்….